الجمعة، 23 يناير، 2015

Sandwich Bar - مطعم ساندويش بار (السالميه)

 

اكتشفت وبالصدفه ان مطعم ساندويش بار اللي فتح في السالميه فرع  ثاني اكبر من اللي بالجابريه


وانا بالمول شدتني المجسمات الكبيره اللي بالسرداب لمن جربت صوبهم اكتشفت ان هذا مطعم مو محل يبيع العاب وتماثيل ،  المطعم  كبير بس ما فيه طاولات وايد تقريبا فيه ٤ طاولات كبار كل طاوله تكفي تقريبا حق اكثر من ١٠ اشخاص


المطعم نقدر نسميه متحف لان فيه فترينات كبيره فيها مجسمات وتماثيل لشخصيات سينمائيه مشهوره في منها القديم والجديد  








الضيافه قهوه عربيه 


المنيو منوع فيه كل شي تقريبا 


اول شي طلبنا الاكل وعلي ما يجهز الاكل اخذنا لنا جوله في المكان 














وبدت الفقرات الترفيهيه والوناسه للاطفال اول شي اييبون اكسسوارات مضيئه ويسكرون الليتات وكل واحد يختار له شي في نظارات ودسوس وكبابيس وغيرها من الاكسسوارت 


بعدها اييبون ستاند ملابس تنكريه لجميع الاعمار وكل واحد يختار له لبس يلبسه ويصور فيه واللي يشتغلون بالمطعم يهبلون يهتمون بالكل يلبسون اليهال ويصورونكم ويسوون اجواء مرح ووناسه 


زوز اختارت ملابس ألسا


وحمني لبس الماسك وصو سيلفي


وعلاوي لبس كابتن امريكا وتقمص الشخصيه


وصار وقت الاكل 






 لقلاصات تشب ليتات 


 ولمن وصل الاكل شابين شموع علي الشيبس والبيرجر ولدي  يقول يما عيدميلاد منو ؟ 


كشب علي مسدس


بس للاسف كامرتي خلصت بطاريتها وما صورت باجي الاكل والحركات كل اللي طلبناه كان لذيذ انصحكم في ساندويش الفاهيتا ، تقدرون تتابعون البوستات اللي نزلتها بالانستغرام فيها مقتطفات و فيديوات عن تجربتي للمطعم Surprise_More@





جوله من خلالها يسترجع الكبير ذكرياته  لمن يشوف ساندي بيل  وغراندايزر والرجل الحديدي ويندهش الطفل ابشوفته لابطال السينما مثل سوبر مان وكابتن امريكا وهولك وغيرهم



المطعم عائلي بالدرجه الاولى المكان ممتع للكبار ولصغار الاكل لذيذ والخيارات منوعه والسعر جيد واللي يشتغلون يهبلون صج ان عددهم قليل لكنهم شايلين المكان شيل وكل الخدمات والاجواء الاحتفاليه المقدمه مجانا ما تدفعون الا قيمه الاكل اللي تاكلونه انصحكم تروحون مع عيالكم وتستمتعون معاهم



المطعم في مجمع بلازا السالميه في السرداب
  يفتح من الساعة ٥ لغايه ١٠ مساء 

ليست هناك تعليقات: