الأربعاء، 19 يونيو، 2013

Regency Hotel Kuwait - Ladies Lounge


الصيف بالكويت حاااار والكل حاسدنا عليه واحنا نتأفف وما انعرف نستغل هالنعمه اللي احنا فيها ، قررت استمتع بالاجواء الصيفيه قلت مالي إلا فندق الريجنسي انا سامعه عندهم لونج خاص للنساء فقط  ومن زمان ودي ازورهم ، ضبطت اموري واتفقت مع صديقتي ورحنا
دخلنا الاستقبال الخاص باللونج قمنا باجراءات الدخول وعادي مو شرط حجز مسبق أستلمنا مفاتيح اللوكرات  
 اللونج معزول عباره عن مبنى من طابقين الاول صاله والاوضي حمام سباحه خارجي والسرداب للشورات وغرف التبديل  
 الطابق الاول صاله كبيره فيها  قعدات مريحه بديكورات هاديه  ولها شبابيك كبيره  تطل علي حمام السباحه الرئيسي للفندق ومن جهه ثانيه تطل علي حمام السباحه الخاص بالنساء هالشبابيك عاكسه بحيث ان اللي بره ما يشوف اللي داخل وفي كاونتر يقدم الوجبات الخفيفه والمرطبات  



نزلنا السرداب علشان نبدل ونحط اغراضنا باللوكر المكان نظيف ومرتب


يا حلات المكان هادي ومناسب للاسترخاء واحلا شي تصميمه اللي يتميز بالخصوصيه يعني مناسب للمحافظات اللي مايحبون الاختلاط والمتحجبات يقطون حجاباتهم ومايحاتون شي  
كراسي الاسترخاء اشكال وألوان منشره بكل مكان ، تقريباً المكان يكفي لـ ١٥٠ سيده بس اعتقد في عدد معين لعدد الحضور علشان لايصير زحمه وما يفقد المكان هدوئه  




 تحت اشعة شمسنا الحنانيه يبيلنا نطلب شي بااارد ومنعش والمنيو فيه عدة اختيارات متنوعه  


  معلومه يمكن مو الكل يعرفها للي يبي يسوي  تان يكثر من شرب عصير الجزر لانه يحفز الاصباغ في الجسم 







البحر صغير وملموم 




بوقت الغدا حبينا ناخذ وجبه خفيفه ونتبرد اشويه داخل بالصاله




عندهم هالمجموعه للعنايه بالشعر الخاصه لرواد البحر وحمامات السباحه


الحمدلله تجربتي موفقه باختياري لاستراحة النساء بفندق الريجنسي استمتعت بوقتي واكيد راح اكون زبونه دايمه خلال فترة الصيف وحبيت عرضهم  تقدرون تشتركون معاهم وتصير عندكم عضويه لموسم كامل او لفتره ثلاث شهور ومن خلالها تستمتعون بمميزات وخصومات مو بس داخل صالة السيدات بعد تشمل الغرف في الفندق والاكل والشرب في مطعم طريق الحرير و الليوان .




يوميا من ٩ صباحا لغاية ٧ مساء
لمزيد من المعلومات اتصل على 25766749


رايكم واقتراحاتكم تهمني تابعوني علي الانستغرام Surprise_More@




ليست هناك تعليقات: