الاثنين، 4 مارس، 2013

جوله تعريفيه لقرية كويتي وافتخر




كل سنه ننطر ملتقي كويتي وافتخر و كل سنه يبهرونا بأفكارهم بس هالسنه غير لان الكل متلهف وناطر افتتاح قرية كويتي وافتخر راح تكون اول قريه من نوعها في الكويت لدعم المشاريع  الصغيره ، اوصلتني دعوه مميزه لجوله داخل القريه للتعرف عليها قبل الافتتاح 
امس كان موعد جولتنا في قرية كويتي وافتخر الخاصه للبلوغر والاعلامين المكان كبير مساحته ٢٠.٠٠٠ متر مربع والكل يشتغل ماشاء الله چنهم خلية نحل بجد واجتهاد ، الساعه ٤ وصلنا القريه مكانها بمشرف بأرض المعارض خلف صاله ٤ واللجنه المنظمه استقبلونا وعلي راسهم السيد ضاري الوزان اللي اخذنا في جوله تعريفيه 


هذي البوابه الرئيسيه للقريه وفوقها غرف خاصه لوسائل الاعلام  ومجهزه بالكامل بعيد عن اللويه والزحمه
اول ما تدخلون القريه راح تلاقون هالبرج علي ايدكم اليسار هو عباره عن مركز معلومات للقريه واللمحلات اللي وراه قهوه بو ناشي المكان المخصص للمطاعم والقهاوي 

البوثات جاهزه للمشاركين

زميلي صاحب مدونة Fried Junk جدام البوث اللي راح يشارك فيه بحوش المطاعم  بقهوة بوناشي اللي يضم ٢٠ مطعم   ،   ومعاه بالصوره الحبوبه Wedding Plan Q8  كانت معانا بالجوله 
بالقريه الكل يبدع بطريقته الخاصه وكلها طاقات شباب ديرتنا

الخوات باللجنه ماقصرو معانا وضحو لنا بعض الامور 


هالمكان مخصص للاطفال فيه  محلات وكل المستلزمات الطفل من تسليه وألعاب بالجه المقابله  "تل بهيته" هو عباره عن خيمة علي شكل قبه تعتبر الاولى من نوعها في الكويت تتسع لأكثر من ألف طفل وبالصوره اللي تحت العمال قاعدين يجهزون القبه ، فكره ذكيه للتشجيع علي الطلعات العائليه 


هالمكان  اسمه ميناء الفرضه لإحياء تراث البحري علي سفينة البوم يحتوي علي ١٠ مطاعم ومقاهي راقيه والبحيره الصناعيه ومسرح المواهب اللي راح يعرض مواهب الشباب الكويتي 


خلال جولتنا في القريه شفت هالكاشخ وشكله مو غريب علي شايفته بمكان !! قلت حق فرايد هذا يشبه دايت نينجا قال ايه اهوا تعالي صوريني معاه هالشخصيتين عكس بعض واحد يحب الجانغ فود والثاني يحب الاكل الصحي ;)
ضاري الوزان ماقصر ويانا وشرح لنا كل تفاصيل القريه 
وصلنا للقسم المبهر اللي اسمه منطقة الدسمه فيه اهم معالم الكويت الماضي والحاضر والمستقبل منحوته من الرمل قامو بنحتها ٩ نحاتين من امريكا استخدمو ٧٠٠ طن من الرمل وتعتبر اكبر مدينه رمليه في الوطن العربي  


الصراحه المكان روعه والتمشي فيه متتعه واكيد راح تكون القريه احلا واحلا بعد الافتتاح واتمني بعد هالمجهود والعمل الجبار تكون القريه مكان ثابت للمشاريع الصغيره ويعطون فرصه للشباب اللي ما شاركو يشاركون


الرسومات علي لطوف عجييبه الصراحه الواحد مايدري شيطالع او شيصور والله يعينا وقت الافتتاح ;)

















اذا عجبكم الموضوع لاتحرموني من تعليقاتكم ومتابعتكم لي علي الانستغرام 

هناك تعليق واحد:

غير معرف يقول...

الصراحه موضوع رائع و جميل و مدونه تستاهل المتابعه