الخميس، 28 فبراير، 2013

Bagels Factory

امس جربت البيغلز من مطعم "بيغلز فاكتوري" حددده لذييييذ المطعم صغير  بشرق بدروازة العبدالرزاق 






هذي انواع خبز البيغلز اللي يقدمونها (ساده ، بصل ، سمسم ، دارسين وكشمش ، طمام مجفف  وأسمر) جربت ثلاث انواع ترفين وفرش




بيغلز ساده بالدجاج ماكانت لي بس يقولون لذيذه


بيغلز بالبصل بالاومليت وايد لذيذه


بيغلز اسمر بالاومليت


حبيت هالرسمه الموجوده علي الكيس تشرح البيغلز

اللي يشتغلون بالمحل شحليلهم بشوشين وخدمتهم سريعه 

عندهم خدمة توصيل الارقام والانستغرام بالصوره 

الأربعاء، 27 فبراير، 2013

Sprinkles CupCakes @ Avenues

فتح بغراند افنيوز  " سبرينكلز كب كيك "  محبوب مشاهير هوليود فرعه الاول في الشرق الاوسط  اللي تأسس في بيفرلي  هيلز 
عندهم اشكال وألوان من الكب كيك الواحد يحتار شنو يختار شكلهم يشوق جربت ثلاث انواع طعمهم عادي مافيه زود 
اخترت ريد فيلفت
بلاك آند وايت  
سينابون








الطاولات والكراسي يشوقون علي شكل الكب كيك واللوغو

الثلاثاء، 26 فبراير، 2013

مطعم لورد أوف ذا وينغز - الكويت

مطعم لورد أوف ذا وينغز فتح في الدسكفري مول هو مطعم له عدة افرع في لبنان يتميزون بالوجبات الطازجه وأهمها أجنحة الدجاج يحضرونها لك  حسب طلبك وبالطريقه اللي تفضلها


المكان كبير وله مكان خاص وتقريباً يعتبر مفصول عن ازعاج الطابق الثاني بالدسكفري مول


المطبخ مطل علي صالة الاكل وتقدرون تشوفونهم واهما يحضرون الوجبات بكل سرعه ونظافه 


هذا شكل المنيو عباره عن لوحه فيها بروفايل  صور للوجبات المقدمه وورقه بالتفاصيل والاضافات اللي تفضلونها  وقلم رصاص


ماعليكم الا تحطون صح بالمربع اللي جدام طلباتكم اللي اخترتوها وتسلمونها للغارسون



عقب ما ضبطو لنا الطاوله يابو لنا سله فيها دسوس بلاستيك !!! عقب راح تعرفون ابشنو نحتاجهم




هالعصير لذيييذ عباره عن ليمون بالرمان حامض حلو


اجنحة الدجاج بالثوم والجبن


اجنحة الدجاج المشويه عجييييبه طعم الشواء فيها واضح وتتبيلة الليمون عجيبه طلبناها حراره عاديه 


چيلي چيز فرايز لذييييذ قضينا عليه


 الناتشوز تقدرون تضيفون عليه اي اضافات بس احنا طلبناه عادي الصراحه خطيييير انصحكم فيه

وييه وقت لبس لغلافز علشات ناخذ راحتنا بأكل اجنحة الدجاج 






اكيد راح يكون مطعم لورد اوف ذا وينغز في قائمة المطاعم المفضله عندي 

الصراحه الاكل لذيذ والقعده مريحه والسيرفس ممتاز ، المره اليايه راح اجرب اصناف ثانيه حاطه عيني علي البيرغر واتمني ما يصير فيني تخمه واقدر احلي عندهم لان منيو لسويت يشوق ، وبالنسبه للاسعار  جدا معقول وعادي 





دسكفري مول الطابق الثاني 

انستغرام : Lotw_kw

الاثنين، 25 فبراير، 2013

فيديد للعرض الضوئي علي برج الوطنيه للاتصالات بمناسبة الاعياد الوطنيه


واحنا طالحين من مجمع دسكفري سمعنا صوت موسيقي سمفونيه قويه ... انا قلت اكيد الصوت من النافوره الراقصه ... لاااا الصوت مو من النافوره مسكينه وين فيها حيل يطلع منها كل هالصوت ;)  رفعت راسي وتلفت وآلا اشوف عرض لايف بروجيكت ضخم علي  برج شركة الاتصالات الوطنيه الجديد   اخذنا السياره ورحنا مواقف  صالة التزلج لانها المنطقه الاقرب والمقابله للمبنى وكان في سيارات غيرنا واقفين يطالعون العرض

video
 


الصراحه عمل قوي من شركة الاتصالات الوطنيه حبو يشاركون بالاحتفال بالاعياد الوطنيه وزادو بهجتنا بأعياد ديرتنا الغاليه 










استمتعنا بالعرض الضوئي المذهل وعسي الله يديم افراحنا




العرض مستمر  لغاية ٢٨ فبراير ٢٠١٣

 يبدأ من الساعه ٧ مساءاً 

المكان : مدينة الكويت ، شارع السور بالقرب من برج التحرير

كرك هاوس


 الكرك وصل الكويت ياجماعه ... قبل اسبوع فتح محل كرك هاوس  المتخصص  بالكرك (چاي حليب) المشهورين فيك اخوانا لقطرين و عندهم  چباتي لذييذ وفي عدة اضافات تقدرون تضيفونها عليه مثل (الزعتر ، الكرافت ، الشيدر ، الحلوم ، المربى ، النتولا) 


مكانهم بشرق دروازه العبدالرزاق 

طعم الجباتي خفيف ناشف مو غرغان دهن مثل باجي المطاعم المختصه بالچباتي


جربنا كل الاصناف ماعدا النتولا والمربي ، الحلوم عجييب والشيدر لذيذ والصراحه كل اللي جربناه حلو




مكانهم علي الشارع العام المقابل لمجمع البنوك ولاتحاتون المصافط خلف العماره واذا ماكو زحمه تقدرون تصفطون جدام المحل مباشره وايونك ليه عندك ياخذون الطلب وانت بالسياره 





بما ان الزينه بكل مكان واحلاها بشرق وجبله فقررنا ناخذ لنا جوله بطعم الكرك ونشوف زينة حبيبتنا الكويت ونصور كوب الكرك مع اهم معالم ديرتنا الغاليه







العنــوان
 شرق  ، دروازة العبدالرزاق ، مقابل مجمع البنوك 


وصف العنوان 
- اذا صارت لبلوكات علي اليسار وحلويات الكواكب علي اليمين كرك هاوس بعد حلويات الكواكب 
- اذا ماكدونالد المباركيه علي اليمين وجدامكم الاشاره تاخذون فرعي يمين  وبعدها بـ ٣٠٠متر كرك هاوس علي اليسار مقابل البنك الاهلي المتحد 


اوقات العمل
من ٧ صباحاً لغاية ١ ظهراً
من ٥ المغرب لغاية ١١ مساءاً


هاتـــف
 ٥٠٩٧٩٠٠٠


انستغرام
 karak_house@
             


اذا عجبكم الموضوع لاتحرمونا من تعليقاتكم ومتابعتكم لنا علي الانستغرام surpriseandmoreblog@