الأحد، 11 نوفمبر، 2012

احتفال الكويت باليوبيل الذهبي للدستور



امس كان يوم مميز وماضل صغير وكبير ولا مواطن او مقيم الا استانس بالاحتفال الرائع علي مرور خمسين عام للدستور الكويتي اللي ابهر العالم ، امس كنت محتاره ما ادري وين اروح علشان احضر الاحتفاليه كنت بين امرين اروح مع الاهل باليخت وانشوف الالعاب الناريه من البحر او مع الاصدقاء متجمعين في بيت مطل علي الابراج والخليج العربي .

اخترت اروح مع الاهل علشان نشوف الالعاب الناريه علي راحتنا من غير زحمه نرلنا من نادي اليخوت المغرب وكانت الشوارع  شبه زحمه الكل متجه للبحر بس كل شي امنظم ورجال الامن بكل مكان .


كان منظر الكويت من البحر عجييب عروس كاشخه ناطره يكتملون المعازيم علشان يزفونها ويحتفلون في  احلا عروس
انطلقت الالعاب الناريه الساعه ٨ بالليل شي عجيب وخيال ما ندري وين نطالع لان البحر ممتد جدام عيونا من الابراج ليه الجزيره الخضره وكانت مجموعه كبيره من اليخوت والطراريد تتابع الاحتفال بالبحر ورجال خفر السواحل منتشرين بكل مكان ماقصرو إمنظمين الامور الساحليه وفي طوق امني محد يقدر يتعداه 


ماقدرت اصور وايد لان الصور كلها مهزوزه بسبب هالهواء وكثرت الطراريد والتصوير الليلي لازم تكون الكاميره ثابته ضاق خلقي ابي اصور ، خليتهم يردوني نادي اليخوت  وبما ان الالعاب الناريه مدتها ٤٠ دقيقه وتجمع صديقاتي جريب  نجحت بمغامرتي ومداني اوصل وأصور أحلا اللقطات من أحلى أحتفال بالعالم اتركم مع الصور 


يا حلو الابراج تغنت وارقصت وألبست لنا مليون ثوب ربي يحفظج يا كويت وتدوم افراحنا كان منظر الالعاب الناريه يثلج الصدر تدمع له العين من الوناسه 





الكويت اخذت رقماً قياسياً في موسوعة غينيس العالميه بأطول عرض ألعاب ناريه استمر علي مدى ٤٠ دقيقه وشهد   ٧٧٢٨٢ مقذوفه ناريه.

هناك تعليق واحد:

غير معرف يقول...

تصوير وتقرير اكثر من رائع