الخميس، 23 فبراير، 2012

زيارتي لحديقة الحيوانات العمريه الجزء الثاني

 مثل ما وعدتكم راح انزل لكم الجزء الثاني من زيارتي لحديقة الحيوانات العمريه ... بس هالجزأ يضيق الخلق لان الحديقه ماتطور شي فيها من ٢٠ سنه  كل شي نفس ما اهوا ....  ما جنها حديقة حيوانات جنها حضيرة او بالعاميه جنها "ياخور" .... كل شي قديم كل شي امرقع كل شي متهالك وما يتحمل الترميم ... ليش والله شي يضيق الخلق راح اتركم مع الصور اللي اخذتها خلال زيارتي ....


 تقريبا بأغلب  ممرات الحديقه نشوف هالمنظر اللي اهوا طابوق متناثر وحفر بعد اعمال البناء !! انزين قلنا بترممون بس لسلامة الزوار اللي اغلبهم اطفال اسوي شارع واخلصه بنفس اليوم وانتقل للشارع الثاني مو اقشر كل الحديقه بوقت واحد وانتو تدرون كل يوم في زوار !! (هذا اذا ماكان هالمنظر من زمان والمقاول ساحب عليهم وماكمل الشغل ) 


 


بهالصورة ماني قايله المقاول سحب عليهم وماكمل الشغل بنقول ان اليوم الصبح كان في عمال يشتغلون يعطيهم العافيه بيرممون علشان يزيدون الحديقه جمال بس الله يهداهم ليش ما شالو هالصخر من وراهم وباجر ايون يكملون باجي شغلهم >>لسلامة الزوار ولمنظر افضل << صح 

 




اشرايكم بالمنظر ؟!!! اترك التعليق لكم ...






نفس الشي اللي قص اغصان الشجر مايعرف يشيلهم من وراه 

 
كل مكان بالحديقه  نشوف هاللافته يمنع منعا باتا ادخال اي انواع من المأكولات بداخل منطقة المجموعه الحيوانيه .. والناس مالها شغل ولا رادين علي احد لا حسيب ولا رقيب .


 



بالصوره اللي فوق واللي تحت لاحضو اللوحه التعريفيه الموجوده على القفص فاضيه !!؟   علاوي يسألني شنو اسمه هذا ما عرفت ارد !!!



ونفس الشي اهنيه العامل اللي غطا القفص بالقماش الاخضر ما يعرف يقص الزايد ويشيله ؟؟ حلوه يعني هالمنظر !! 


معقوله مافي اختراع يترسون فيه ماي للحيوانات افضل من هالبانيو .....(بانيو مره وحده ) 


كنا نمشي ونسأل وين الاسد لان علاوي ياي الحديقه علي شانه ... رفعنا راسنا وشفنا هاللوحات قلنا زين اسرع طريق للوصول للاسد لكن للاسف اسم الاسد مو موجود .... شي حلو انهم مهتمين بارشاد الزوار عن مواقع الحيوانات بس اعتقد هالساينات من افتحت الحديقه ما غيروهم ومن الشمس اللوحات تبططت  ومثل ما انتو أملاحظين انهم حاولو يصبغون العامود بس يمكن الصبغ خلص :))   مكتوب الجمل العربي !!! ما شفت بالحديقه لاجمل عربي ولا اجنبي ولا في منطقه لركوب الحيوانات !!!  انا ما اتسبب ولا رايحه الحديقه علشان ادور على هالعيوب لكن الاهمال طاغي بكل شي وبكل مكان .


حتي كامرتي ضاق خلقها من المناظر وقامت تلتقط صور مو واضحه .. بذمتكم منو بالكويت ليمن الحين يحط برادة ماي بهالشكل ؟ وين المجسمات اللي الشركات تتنافس بأشكالها حتي البيوت قامو يحطون ماي سبيل باحلي الاشكال مو حديقة حيوانات حاطين برادة ماي امصديه هوزاتها طالعه ووايراتها ظاهره محد يشتهي يشرب منها .


ما اصدق !!! معقوله ؟؟ حفره بهالعمق لو يطيح فيها ياهل منو المسؤول ؟ .. والله حرام اللي قاعد يصير ما اعتقد احنا نوصل ليه هالمستوى لو مهما يصير وتحت اي ظرف  او عذر من ناحية نقص بالميزانيه او اي سبب اخر نجهله يخلي مستوى حديقة للحيوانات في دولة الكويت اللي تعتبر احد المرافق السياحيه للدولة بهالمستوى ؟ ... لمن يزورها السائح يشوف هالتكسر بجميع ممراتها ومرافقها اللي مافيها امن وسلامه ؟ او يشوف الحيوانات الدايخه ؟ او يشم الريحه اللي تبط الراس ؟ .... وان سافرنا ورحنا حدايق الحيوانات اللي تدهش الزاير  ماتدري شنو تطالع من حيوانات وإلا ديكورات وإلا تنسيق هالاشجار والله نتحسر على عمرنا ..


قبل باب الخروج في محل هدايا استانسو لعيال علشان يشترون هدايا تذكاريه من حديقة الحيوانات 


لمن جربنا من محل الهدايا انصدمنا من نوعيه  الهدايا !!! العاب بلاستيكيه رديئه الصنع وتنباع بمبالغ عاليه والبايع يعصب اذا قلت له هذا يبيعونه ب ١٠٠ فلس  ليش انت تبيعه غالي؟ ... توقعنا بنحصل مجسمات وميداليات وتي شيرتات عليها حيوانات بما ان احنا في حديقة حيوانات .



هذا المنظر بظهر  محل الهدايا  الظاهر اللي حط هالمكاين والطاولات واللي ما همه المنظر العام على باله اهو خاشهم ومحد بيشوفهم  يمكن نسى المحل بنص الحديقه ومكشوف من جميع الجهات .


هذا باب الخروج ولازم اليهال يلزمون بريك عند اللي يبيعون على اليمين واليسار انزين ادارة الحديقه عاجبها المنظر !!  تاركه البياعين عارضين اغراضهم على الارض ؟؟  ما في طريقه حضاريه  تليق بمستوى حديقة  الحيوانات  لتنبيه  البياع لعرض بضاعته بطريقه افضل من هالطريقه .


اول ما ندخل العمريه واتصير حديقة الحيوانات علي اليمين نشوف هذ المجسم اللي مغطينه بقماش  من سنين  ما ادري شنو سالفته وليش امغطينه !!  



حصلت صورت المجسم من الانترنت ما اعتقد فيه شي يستحق التغطيه واللي يعرف السبب يرسل لي  علشان في وايد نفسي عندهم نفس التساؤل .

ليست هناك تعليقات: