الأحد، 20 نوفمبر، 2011

رالي الكويت المحلي ١٨-١٩ نوفمبر ٢٠١١


يوم الجمعه ١٨ نوفمبر حضرت انطلاقة رالي الكويت امام فندق هوليداي ان - السالميه  كان الجو العام منظم ممتع  والشي اللي لفت نظري تواجد العوايل يعني المكان مو منحصر للشباب .


 والساعه ٧:٣٠ مساء بدا الاعلان عن البطوله  وانزلت ستاره من الالعاب الناريه من منصة الانطلاقه وبدت السيارات بالدخول تحت المنصه واحده  ورا الثانيه كان منظر السيارات عجيب  واللي عرفته ان  السيارات مجهزه تجهيز غير عادي وتحت شروط الامن والسلامه وكان عدد السيارات المشاركة ١١ سياره وجميع السواق من الكويت










وباليوم الثاني اللي اهوا يوم السبت أصريت اني  اروح  بنيدر لاني تحمست و حبيت اتابع الفرق المشاركه واشوف الرالي على الطبيعه ... كان مكان التجمع في بنيدر يم المسجد واللي شدني وجود الشرطه والاسعاف والمطافي


 الساعه ٩:٣٠ بدت انطلاقة اول سياره كانت المراحل عباره عن ٦ لفات شكل السيارات يونس ويخرع بنفس الوقت ما اتخيل نفسي داخل اي سياره من السيارات احس يوقف قلبي من السرعه اللي شفتها " الله يحفظهم "




 






كانو المشجعين وايد ومتوزعين على كبر البر ومتحمسين للرالي نفسي والكل ملتزم بالمكان المخصص  اللي مايعيق السيارات المتسابقه ولسلامة الجميع





انتهى الرالي الساعه ٢:٣٠ بفوز المتسابق مشعل النجادي  اللي سيارته برعاية الخطوط الجويه الكويتيه الحاصل على بطولة الشرق الاوسط للراليات اكثر من مره .


الفائزين بهذي البطوله حسب الترتيب هم :

المركز الاول ( مشعل النجادي ومساعده احمد الخرس )
المركز الثاني ( مسعود الصالح ومساعده عثمان همدار )
المركز الثالث ( صلاح بن العيدان ومساعده ناصر الكواري )
المركز الرابع ( عصام النجادي ومساعدة انور الشراح )
المركز الخامس ( صالح العلي ومساعدة علي الفيلكاوي )



والرالي ما انتهى على جذيه وبس كان بالليل حفل عشاء على شرف الفايزين وتوزيع الكؤوس في فندق الهوليدي ان - السالميه ، انا ما حضرت العشاء لكن اوصلتني الصور من مصادري الخاصه ;)


الفائزين بالمركز الاول والثاني والثالث بالمؤتمر الصحفي واللي شدني ولفت انتباهي الكؤوس وايد حلوه فكرتها غير اعتياديه ومو مكرره


فريق الفائز بالمركز الاول مشعل النجادي مع  رئيس لجنة الراليات بنادي الربع ميل الشيخ عذبي الصباح


ليست هناك تعليقات: